في جمالك من يلوم الشعر لو حس بقصور

أو تعثر بين حسنك والعيون الساحرات

وإنت ياللي لك حضور يحبس أنفاس الحضور

وإبتسامة من حلاها تختصر عشرة بنات

أي وصف وأي مدح وأي أحاسيس وشعور

تنصفك يالعذبة وإنتي جامعة كل الصفات

ناعمة قد وجديلك ليل ومحياك نور

هادية مثل النسيم وضحكتك سكر نبات

وحدك اللي لا حكيتي فاح الأصلي من البخور

وحدك اللي لا سكتي يا بخت حتي السكات

طلتك مثل السعادة فيها شي يبعت سرور

تدخل القلب وتشع الطيبة في كل الجهات

آآه لو تدري الصبايا فيك وإيش راي الزهور

وكيف لو مر بيها زينك تسأل الله الثبات

وإلا كيف إن المرايا تشعر بفخر وغرور

لا إنعكس وجهك عليها وإمتلت حسن وحلات