دوم في بالي خيالك من غلاك

صورتك منها تصاوير الصِّور

وين ما أنظر يقابلني حلاك

في السِّما، في الأرض، يا أحلى قُمر

من كثر ما الله من الفتنه كِساك

تنشرب يا صويحبي لو بالنظر

قلبي المحروم خايف من جِفاك

مرتبش ويدق ناقوس الخطر

إنته صِدق انسان أو إنته ملاك؟

لانّ هذا الزين ماهو في البِشر

ذابحنِّي من حلاك ومن صباك

وتاركنِّي وما لفى منِّك خبر

في شِفاك اموت، ويلي من شفاك

شافيه ولكنَّها الموت الحَمَر

والخدود اللي سناها من سناك

كِنّها زبدٍ يحَوِّطه الجَمَر

البدر له يوم و انته في سماك

بدر كامل طول أيَّام الشَّهَر

لو يجيك أعمى وأصمخ من حلاك

له يرد السمع ويرد النظر

ولو على ميِّت تنادي من نداك

ينتفض ويقوم ويخلِّي القبر

ما كِفاك اللي أحسه، ما كفاك؟

دمع عيني جاري وقلبك حجر

تابعنِّك لو مصيري للهلاك

روف بي مالي على بعدك صَبُر

تخطي في حقِّي ولايهمك خطاك

وأنا لي اجيك راجي وأعتذر

فاض مابي هل أنا مب مستواك؟

يا غرورك أنا منك أكبر قَدِر

يا صغير السن تاليها معاك

حِلَّها يا بوثمان وبو عَشر