بعيد بعيد ما تهمني العواذل

ولا حاسد ولا حاقد رماني

كلامٍ مستفز طالع ونازل

وأنا مثل الجبل راسخ مكاني

اعرفك في المحبه كنت فاشل

ولا لك مستوى أو دور ثاني

بعلمك عاد لو عاجل واجل

وتاخذ درس من حاضر زماني

تركت اللي غدر تحصيل حاصل

ولا أثر علي ولا أعاني

ترى ما تهزني ريح و فواصل

وكل من غشني وباع ونساني

أنا نزهت نفسي ما أجامل

مدامي نسل عالين المعاني

ولا يهمني حسود وشخص جاهل

وأنا لي عزتي واسمي كفاني

أبوي اللي شموخه في المحافل

وعلمني صفات الطيب ثاني

من أيام الصغر وأحلى المراحل

مثل أعلى وقدوة واحتواني

مقامي غير عنك لا تحاول

ولا تحلم برجوى أو أماني

لغيت أمرك تراك بفعل فاعل

ولا تسوى وبعطيك الضماني