عن صاحب قفّوا به وشلّوا به

ما حد غيري بالعمر أولى به

غرٍ غريرٍ غرنجي واعجوبه

فايق بزينه ووصوفه الجذّابه

هو منيتي وهو عمري و مطلوبه

حايز رضى لفواد ثم اعجابه

حكم القدر غلّق عليّه دروبه

وانصكت بويهي جميع ابوابه

واستسلمت نفسي وقالت توبه

و الوقت خلاني اعيد حسابه

والهم شيّد في حشايه طنوبه

حتى لذيذ النوم ما اتهنّا به

قلبي تعب من حبه ومحبوبه

ما يحتمل زودٍ على ما صابه

وعيني على هل الدمع مغصوبه

والنفس متعوبه غدت بـاسبابه

ما حد خبّرني بخبر من صوبه

من غاب عن شوفي وطال غيابه

الصاحب اللي روّح وقفّوا به

أحنّ له وآموت به واحيا به