انا خاطري قدله قريب الشهر حساس

بعد هزت رياح المقادير هقواتي  

أهوجس وياخذني على بابك الهوجاس 

واحاكيك واسمعني ياسيد علاقاتي 

محطات عمري واجده مالها مقياس 

واشوف انك اعذب مرحله في محطاتي 

طموحاتي تناديك بين الرجا والياس

امانتك أمانه لا تهمش طموحاتي

تعال ابغي عيونك وقلبك فـ كلمة راس

واعلمك عن هزايمي وانتصاراتي 

مثل ماخلد شعر الفرزدق وابو نواس 

ابصورك واخلدك في كتاباتي

في راسي من الشعر وفي صدري من الاحساس

مايجعلك تستكثر علي إبتساماتي 

تمر المكان وتنحني لك قلوب الناس

هذا قلبه يسلم وذا قلبه يحاتي 

من المفترض ماتمشي الا معك حراس 

حسب رايي الشخصي وتقديري الذاتي

علي الحرام انك قمر لبسوه لباس

تفكر له العالم متى عاده .. بياتي! 

تزين بك الفضه ويكشخ بك الالماس

ويشفق لك فوادي وتطرب لك أبياتي  

لو أن الليال اللي تردك علي تنباس 

ابحبها لين استرح من  .. معاناتي 

أحبك كثر ماهو يجيبك لي النسناس

وكثر ماتردد صورتك في خيالاتي  

أحبك وانا فارح وأحبك وانا محتاس  

واقدرك واداريك في كل حالاتي 

على عينك اللي دايماً تخطف الانفاس

تلفات قلبي كل يوم وتلفاتي  

وعلى وجهك الزين وعلى قدك المياس 

امان الله وحفظه وصادق تحياتي