سر بنا بر و بحر أرض وسِما

وين ما تامر عـلينا حاضرين

يا دليل الرَّكب يا حامي الحما

عهدنا للدار عهد المخلصين

للمعالي سيدي فينا ظما

نَورد عيون الفخر متكاتفين

ما انثينا يوم طشاش الدما

دون خشم الرمح سوّى مَفرَقين

و لا نشدنا كيف او قلنا لما ؟؟

دامنا في صف سيف المسلمين

ذاك ابو خالد دوا عين العِمى

يِكعَم الخصم و يغيث الطيبين

خيره اللي وين ما يقبل هِما

ارتوت به الارض واخضرّت سنين

سابق الحكام و ملوك اعظما

من فعولٍ منّها يشيب الجنين

أمس يوم الحرب نارٍ تَضرما

ساق جيش الحق للمستضعفين

وقفته طيب و شجاعه وانتما

للعروبه و لجميع العالمين

و يوم ما كف الوبا بيده وِمى

هز كل الارض هز بطرف عين

إختفت من هول الامر الانجما

إلّا نجمه في السما وحده يبين

أشهد ان الفعل لمحمد و ما

غير ابن زايد به إشعاري تزين