للوطن لبّيه يوم انه نِهَم 

ولنداه انقوم كلنا بالزحام 

كلّنا للدار نوقف باللِّزَم 

للدفاع وكل ما يغلا يسام 

نَفتدي الاوطان بارواحٍ ودم 

ولا نعيش إلا على راس السنام

 يا علمنا عهد منّا يا عَلَم

نرفعك ونثبّتك فوق الغمام

حِن لغمٍ للي يحطون اللغم 

وحِن منايا من يضدّون السلام

ضيفنا يَقلط على بِن وشَحَم

والعدو ما لِه سوى قَص العظام

من عِزانا يَبشر بسِعده وتَـم

والله انّه لا يهان ولا يضام

عزمنا يكسر قويّين العَزم

وباسنا من شدّته لا ما يرام 

ان اعتزينا كل صفٍّ ينقسم 

حِن عيال العود مَسمِيّ المقام

"زايد" اللي حطّ له فعل ورسم

في الشجاعه والمواقيف الجسام

لي تعلّا فوق هامات القمم

الحسام اللي على الظالم حسام 

نهزم اللي يَهزم وما يَنْهزم

لاجل موطننا وقايدنا الهمام

يا زعيم الدار حزِّم واحتزم 

ابشغاميمٍ لكم درع وحزام

م القِدَم هلنا يسوقون القِدَم

للمنايا وكنّها برد وسلام

يا محمد حن معك وقت الحَسم

يا حصانٍ ما تعلّك باللجام

يا أسدنا كان تبغينا نهَجم

والله انّا بيوم ناخذ حق عام 

ندحر المغرور ونخَزم الخشم

دون دولتنا وقادتنا الكِرام

للوطن لبّيه يوم انه نهم

ولنداه انقوم كلنا بالزحام