رعاك الله يا ذكرى ليالي اللي تمر البال

تذكرني سعادة يوم أغمض وابحر بفكري

تغّير حالي المنهك طيوف الحب لأفضل حال

تباعدني عن الدنيا وما فيها ولي عذري

أنا العاشق عشقت الشمس والقمره غلا وآمال

أنا المغرم ومازال الغرام يهب في صدري

أنا الماضي وأنا الحاضر وانا مستقبل الاجيال

أنا اللي في ايديني لعبة الاحلام من بدري

أنا الافراح والارباح والفايض وراس المال

أنا الافكار والاسرار وادفن في الفضا سري

بعيد هناك ما ينشاف وان شافوه ما ينطال

أعيشه بيني وبيني وكل الناس ما تدري

اصابر واتصبر واعرض حروفه حكم وأمثال

ومهما راحت الدنيا بأهلها ما نفذ صبري

فمان الله وحفظ الله وتبقى دايما في البال

فمان الله يا شخصٍ مع عمره خذه عمري