ياحسين العود والخد المورّد يا بها عين المشقّى يافتونه

كم عليك انوح واسجع واتوجّد من العناء والهم والروح محزونه

وكم عليك اروح وارجع واتردد ماخذٍ عقلي وتلعب في شجونه

اتلطف لك بحبي واتودّد وارجو منك العفو واتريا المعونه

ياعذابي منك ياالريم المشرّد لي سحر هاروت في نظرة عيونه

الغوى والزين بك فاق وتفرّد غرنجيٍ ما على شكلك نمونه

عود موزٍ نايفٍ خصرٍ مجلّد والكشح والردف ياخذك امجّونه

لي خطف واثنى ع الراس المنقّد فوق شعرٍ ناعمٍ يكسي امتونه

فز له قلبي وغناء له وغرّد بالولع والشوق تتردد لحونه

نام في يوفي وفي قلبي تمدّد في معاليج الحشا مالي اركونه

اشهد ان دمي على حبه تعوّد مدمن به كيف انا بيوز دونه

لي غلاه يزيد في القلب يتجدد الليالي برهنت حبه اجنونه