ما ادري علام البدر وش فيه ما بان

كنّه خجولٍ والسحابه تذرّيه

والقلب تحت الضلع موله وشفقان

يحلم بنور البدر ينور لياليه

سبحان من هو البس النور لانسان

الله كذا دون الخلايق محلّيه

يمشي بثوب التيه زاهي ونشوان

وكل الكواكب بالمحبه تباريه

له عود ما هو خيزرانٍ ولا بان

الشاهد الله حرت وش هو بسمّيه

لا هو نحيف ولا بعد جاك مليان

نايف وذعذاع النسايم يزاغيه

عين المها ممزوجه ابعين شيهان

يبشر بذوق الموت من هو ترابيه

اذا نظرته يكسر العين خجلان

وعين المحب أتوه ما بين عينيه

الليل جاوبني يا ناشد عن إفلان

فلان حاضر لكن القلب يخفيه

اصبر ترى الموعد الى الان ما حان

جالس يراقب ساعته وانت تبغيه

ان جاك افرح واترك الليل خجلان

وبلِّغ فؤادك في محبك أمانيه