فقدتك ولا زلت أتوجد على لاماك

‏واخاف إن صبرت شوي ماعاد تلقاني

‏أنا مثل ما كنت تخبر والعلوم عفاك

‏أعاني بعض الاحيان وأحيان ما أعاني

‏تدارك حطام الخاطر بشوفة محياك

ويازينها لو قلت توّك على لساني

ياكم مرةٍ ناديت بسمك بدون ادراك

وانا داري إنْه بيبطي الرد ما جاني

‏أخبرك تقول إني مع الوقت راح أنساك

وأنا حالفٍ ما أنساك لو كنت تنساني

فلا والله انسى يوم حان الوداع بكاك

وانا خابرٍ ان بكاك كله على شاني

الى جتني علومك من هناك ولا هناك

تشاليت لوني من البعد متداني

عن اللي لحقني عقب فرقاك وش دراك

ياليتك دريت ان الحزن ما تعداني

ولوغبت عنك عندك القلب ماخلاك

عليك انتحى وارتاح عندك وخلاني

ابقضي حياتي ياحياتي على ذكراك

اسافر معك واعيش في عالم ثاني

ولو مت من فرقاك جعل الحياة فداك

ولوعشت ماطولت من سبة احزاني