الكلام إن جيت أعبـّر لك قصيد

القصايـد يا بـْعدي تـبـقى كـلام

وآنا لو بشرح لك اللي في الوريد

بذهِل النجمة وأهِز قلب الغمام

يا فديـت عيونك آمر وش تريد

بس لا تـسألني عن كِثـْر الغـرام

مدري كم أهـواك لكن الأكـيـد

كل سنة من حبي لك بألفين عام

تدري وش معنى وجودك بالمفيد

يـعنـي واحد يـختـصر كل الأنـام

يعني وقتـي وإنت عن عيني بعيد

كوكب ٍ مُوحِش و يـسكنـْه الظلام

كلمة (آحبك) قديمة...والجديد

إني واصِل مَعـْك لحدود الهيـام

يا كِثِر هالناس..غير إنت الوحيد

اللي يصحى بـقلبي وبعيني ينام

يللي ناقِش (ميمك) فـ دَمّ الوريد

يللي حبّك يـزحِم ضـْلوعي زِحام

بسألِك بعد اللي قِلته بهالقصيد

تعتقد هالحب يُوصفـْه الكلام ؟!