هاجس الشعر حاضر يالحروف ارضخي 

الحكاية جلية في حضور العظام 

دام انا سر ابويه اعتزي وانتخي 

قلتها وما عليّه لا عتب لا ملام 

دام اسمي سلامه يالليال اشمخي

وانثري الحب مني في قلوب الانام

دام مانع ابويه ودام مانع اخي 

بالثنينه خطوتي سقتها للامام 

بنت ذاك الشميمي والكريم السخي 

رجل حب واديب وصار رجل السلام 

من غلاته احسّه في مجاري انسخي 

دون شوفه عيوني صعب ليله تنام 

ساس اصل العتيبه صلب ما يرتخي 

هو حشيم وتحدر من قروم ٍ كرام 

يالليالي شراته ما بعد تنسخي

هو بروحه فريد وصار اسمه سنام

انشري يا صحايف للزمن وأرخي 

ان اسمي سلامه وبنت ذاك الهمام 

في وجوه العواذل باعتزاز اصرخي 

واخبري الوقت بنّي صرت راس المرام 

يعل عمره طويل ويعل عيشه رخي 

والله إن القصايد في ابويه غرام