فامان الله ودموع الشجاع مجري الهياب 

 تراها ما تهون إلا على اللي موته مصيبه

على فقدٍ ما يرفاه الرجا في رجعة الغيّاب 

 فراق اللي تناوشه الفنا والغيبه الغيبه

لو إنك يا حبيبي غالي ودمعك له الف حساب 

 وغيرك في البنات البيض ما اعجبني ولا لي به

خذيت من الفرس والصقر والدلة شبه جذاب 

 وصوفٍ لو تمعنها قوي الدين تغوي به

عيون ورزة وعودٍ ما تستر فتنته بثياب 

 ووجهٍ لو تحدا البدر حط البدر في جيبه

عسى الله ما يعاقبني لو إني ماني بكذاب 

 ولا يجعلني اللي ذكر ذنبه من عذاريبه

صحيح إن الموادع حط في قلب الشقي مخلاب 

 لكن يفداك قلبي يا اول وآخر معازيبه

اعرف إن الجروح جروح ما فيها جروح عذاب 

 لكن شيٍ بيبقى منك لو هو جرح ودي به

هذا آخر ما سمع مني وعينه دمعها صباب 

 ووقف والحزن في خافقي يلحق مشاهيبه

لو اللي يلحق العاشق من الفرقى عليه يثاب 

 ما والله اغبط اللي معتكف شهرين في طيبه

وإذا قلت إن هواها في خفوقي فص ملح وذاب 

 وطيت ديارها وافتر قلبي في محاديبه

وإلى مس الحنين اقصى عروق القلب مس اطناب 

 عرفت إنه يمثل سجته وإن الوفا عيبه

أنا مثل الكسير اللي يشوف إن كسر رجله طاب 

 ولا يدري إن عاد الكسر باقي لين تمشي به

يا ليت اللي يروح يروح ويسكر وراه الباب 

 ما يترك باب ذكرا تخطف العاشق وتدوي به

يا بحر الكوت لك مني سلام ومقتفيه عتاب 

 على شاطيك كن الحزن ينطحني بترحيبة

تذكرت العيون الناعسات وسلهمة الاهداب 

 تقول إن في حورها واحد يسولف عن الهيبه

جعل يسقى علي ليلٍ جمع في ضفتك الاحباب 

 هذاك الليل من بدة ليالي العمر يا طيبه

عسى ربٍ جمعني به وحنا من بعضنا اغراب 

 يسججني غلاه الذرب ولا زيد ياتي به